ಮುಗಿಯದ ಫ್ಲೆಕ್ಸ್ ವಾರ್..!! ಮತ್ತೆ ಪಂಪ್ ವೆಲ್ ಫ್ಲೈ ಓವರ್ ನಲ್ಲಿ “ಸಾವರ್ಕರ್” ಬ್ಯಾನರ್, ತೊಕ್ಕೊಟ್ಟು ಸೇತುವೆಗೆ “ಅಬ್ಬಕ್ಕ” ಹೆಸರು!!
ಮಂಗಳೂರು: ನಗರದಲ್ಲಿ ಮತ್ತೆ ಫ್ಲೈ ಓವರ್ ಗಳಿಗೆ ಹೆಸರಿಡುವ ಫ್ಲೆಕ್ಸ್ ವಾರ್ ಆರಂಭಗೊಂಡಿದೆ. ನಿನ್ನೆ ಪಂಪ್ ವೆಲ್ ಫ್ಲೈ ಓವರ್ ಗೆ ವೀರ ಸಾವರ್ಕರ್ ಹೆಸರಿನ ಫ್ಲೆಕ್ಸ್ ಹಾಕಿ ಕೆಲವೇ ಕ್ಷಣಗಳಲ್ಲಿ ಕಿತ್ತು ಹಾಕಲಾಗಿದ್ದರೆ ಇಂದು ಮತ್ತೆ ಅದೇ ಸ್ಥಳದಲ್ಲಿ ಹೊಸ ಫ್ಲೆಕ್ಸ್ ಹಾಗೂ ಭಜರಂಗದಳ ಸಂಘಟನೆ ಹೆಸರು ಬರೆಯಲಾಗಿದೆ.
ತೊಕ್ಕೊಟ್ಟು ಫ್ಲೈ ಓವರ್ ಗೆ ವೀರ ರಾಣಿ ಅಬ್ಬಕ್ಕ ಸೇತುವೆ ಎಂದು ಬರೆಯಲಾಗಿದೆ. ಇನ್ನು ನಗರದ ಕೇಂದ್ರ ಮೈದಾನಕ್ಕೆ ಕೋಟಿ ಚೆನ್ನಯ ಮೈದಾನ ಎಂದು ನಾಮಕರಣ ಮಾಡಿ ಫ್ಲೆಕ್ಸ್ ಬ್ಯಾನರ್ ಹಾಕಲಾಗಿದೆ.
ಕೊರೋನಾ ಲಾಕ್ ಡೌನ್ ಮಧ್ಯೆಯೂ ಕಿಡಿಗೇಡಿಗಳು ಫ್ಲೈ ಓವರ್ ಮೇಲೆ ರಾತೋರಾತ್ರಿ ಬ್ಯಾನರ್ ಹಾಕುವ ಕೆಲಸ ಮಾಡುತ್ತಿದ್ದು ಇದರ ಹಿಂದೆ ಯಾರಿದ್ದಾರೆ ಅನ್ನುವುದು ನಿಗೂಢವಾಗಿ ಉಳಿದಿದೆ. ಪಂಪ್ ವೆಲ್ ಫ್ಲೈ ಓವರ್ ಮೇಲೆ ಭಜರಂಗದಳ ಎಂದು ಬರೆಯಲಾಗಿದ್ದು ಉಳಿದ ಕಡೆಯೂ ಒಂದೇ ಸಮಯದಲ್ಲಿ ಬ್ಯಾನರ್ ಹಾಕಲಾಗಿದೆ. ಸಮಾಜದಲ್ಲಿ ಪದೇ ಪದೇ ಶಾಂತಿ ಕದಡುವ ಇಂತಹ ಕೆಲಸದಲ್ಲಿ ತೊಡಗಿದವರನ್ನು ಪೊಲೀಸರು ಬಂಧಿಸಬೇಕು ಎಂಬ ಒತ್ತಾಯವೂ ಸಾಮಾಜಿಕ ಜಾಲತಾಣಗಳಲ್ಲಿ ಕೇಳಿಬರುತ್ತಿದೆ.
